اوزومده جوجه رن گونش تومورجوقلارین
کیمسه نی یاندیرماسین دیه
ایکی اللریمله قوجاقلادیم.
و گؤزومده ائکیز ائکیز بالالییان
بولوتلاری --
کیمسه نی ایسلاتماسین دیه
ایچیمه چکیب
اوره ییمه توخودوم.
سورا سورا
گونه شین قوینونا آتیلیردیق.
جمده گیمیز اود توتوب یانسادا -
تر دوداقلاریمیزین ادعاسی
اؤپوشله ریمیزی
کول اولماقدان قورویوردو
ایشیقا چیخاندا
چیینه دی توپورجه یینی
اوتدو اؤزونو .
بیر ایلغیم ایچینده
آغزین یوماراق
سیخدی
بوغاز
ایپینی
قلم--
بارماقلاریمین قانین امیردی
و لاله لر قوجاقی
سرینیدی بیرداها یازماقا
و دوداقلاری لام باخاردی دونیایا.
اللری یویورکن
آیاقلاری قوجاقیندا یاتاردی .
کیپریکلری بیر بیریله اؤپوشوب
اوزوم گیله سی دوغاردی گؤزلریندن
آیاقا دورماقا بیر آناسی واریدی
اوخویاردی آغلایاردی
گؤزلرینه بالاسینین
ساکت دینمز و دانیشماز آیاقلاری قوناق گلنده.
کوچه لرده ویسل گزن گوزلرین
ماکتینه
و آرخاسینجا گئدن
قارا ساققاللیلار تله سیردیلر
گونه شین باتماقینا .
گوز یاشلارینی
قانادی سینمیش شعیرلریمین
قاپسیندا باسدیراجام
دردلرینین ساچیندان یاپیشیب
کل باشیما اکدیره جم
کانسر توتسان ایچیمده داشییاجام
اولوم اولسان بئله
سنی دوداقلاریملا قامچیلاییب
قوللارینی بوینوملا اوپوشدوره جم
سن توپراقا
منده .
بو اوسونلو شهرده بیزه قالان
تک اوره گیمیزیدی
من اونو شیفره له ییب
بعضا جیبیمده
بعضا یوخولاریمدا ساخلاییردیم
بیرگون یوخودا اولارکن جیبیمدن چالیندی
شیفره سنی آچا بیلمه دیلر
و بیر زیبیللیگه آتدیلار
بیر گون اوشاقلار
قاباقلارینا قاتیب توپ اویناتدیلار
بیر گون پیشیگین الیندن
ایتلر آلمیشدی
و بیر گون بیر بساققالی کوک کیشینین آیاغی آلتا قالمیشدی.
آنجاق گوزلری هله گوروردو
آیاق اوسته دورا بیلیردی
و من یوخولاریمدا تئز تئز
الیمی جئبیمه قویار کن
اونون یولونو گوزله ییردیم
قارا قامچیل قان الیندن بئزمیشدیر.
اوز توتوب گونشه دوغرو هونکوروردو
و گؤیدن یئره
یاغیشلا قان اوپوجوکلری دوشوردو.
طرابلسون ــ
یانان دیوارلارینین
پیچیلدیسی گلیر.
بوردان
تهرانین ــ
کار قولاقینین ،
آچیلمایان سحری دیسکینیر.
بو جیندا میداندا:
اوردان مئییتلرین --
بیری اولو
بیری دیری چیخیر.
و بوردان
هئچ بیر دیرینین --
صاباحا اومیدی یوخدور.
صاباح اوز یئرنده یاتیر
و قارانلیق اویاق قالیر.
گونش پارتلاییردی
اونلارین
تانکلارینین دیمدیگیندن--
گئجه لرین ایشیقی گلیردی.
بیز
گون اورتا چاقی
آخشامین نهاریندا قوناقیدیق.
اونلار
یاتمیش آزادلیقین
پئنجه ره سینده یووا سالیردیلار
گؤزومه گونشی
وآیاقلاریما داغلارین
داشلارینی تاخیب
سنی آختارماقا گلیرم
حیاتین درین قاپیلارینی آچیب:
یاشاماقا گلیردی انسان.
بیلمیردی کی :
گونش ، توپراق ،و سو
انتهار ائده جکلر اونون الیندن .
من ائله آغلاییردیم کی:
گؤز یاشلاریم—
یاغان یاغیشین پالتارینی ایسلادیردی
و سن ائله سویوق ایدین کی:
نفسین –
یاغیشی، قارا دؤنده ریردی.
آیاقدان باشا سیلاحلانمیش
اومودسوزلوق کوله یی-
آرزو تئلله ریمی دیرناقیندا دیدیردی.
گؤزومون ایچینده –
آچیلمایان سوبای سحریمین ایزلری
دینمه دن ارککجه سینه آغلاییردی.
و من –
بیر اؤگئی اوشاق کیمی –
اوزاقدان اؤزومه باخیردیم.
تاماهیم یاشاماق اولسادا-
حسرتله گونش یئرینه
بیر گؤز ایلغیمیندا
یاری پاسدان یاری پیدن –
بیر شامدا یاندیرا بیلمیردیم.
اؤپوردو،
سویوق قار گیله سی
تپه ده ن دیرناغا جمده ییمی .
باشیما چکیردیم ،
شپه لرین قورخوسونو .
و قوجاقلاییردیم،
سیزاقلارین درینلییینی.
آج ایدیم ،
لوت ایدیم ،
کیمسه سیزایدیم .
یوللاری الیمه گؤتوروب ،
چؤره ک
پالتار
و آرخا آختاریردیم.
مندن فرمان آلمایان آیاقلاریم ،
تله سیردی یولون سونونا
آغزیم سؤز توتموردو
و گؤزلریم باغیریردی اوستومه.
آز قالیردی ،
چاتیردیم یوخولاریمین شیرینلییینه
چاتیردیم صاباحیمین گوموشو قاپی سینا
اؤزوم اؤزومون
الیمدن یاپیشیب
دارتیردیم و سورویوردوم اؤنومه ساری،
آیلار اؤتدو ایللر کئچدی
آچیلمادی سئحیرباز یوللاریمین قاپیسی .
دونموشدو یوللاردا اوخویان قوشلارین سه سی ،
شاختا ویرمیشدی آغاجلارین نفه سین.
من یئنه
آج ایدیم
لوت ایدیم
و کیمسه سیز.
بوردا
زامانین 24 ساعاتی یوخدور.
ساعات بیردن اون ایکیه دک اولور.
و بو اون ایکی ساعات ،
باشینی بوزقارلارا قویوب –
اوستونه سیزاغلاری –
و ایچینه قارانلیغین درینلیینی چکیر
یاتیر گوجلولرین قوجاغیندا.
اویانیر بانکالارین حسابیندا.
خورولتوسو گوله لرین قاهقاهاسی.
قازاندیغی ،
بیزم آرزولارین—
ماویلیگی.
ایتیردییی،
دار گونون یوواسیدیر.
و بیز—
بو اون ایکی ساعاتین ،
(بیر مای)ی دا اولمایان
ماعاشسیز ایشچیسی.
قاطارلار
دوز یولو گئتمه یی
بیزدن اؤرگه شیردیلر.
دلی کوله کلر
دینجه لمه یه
یئر آختاراندا
بیزه سیغینیردیلار.
و بیز قارتال کیمی
قیها چکیب
کئچیردیک گئجه لرین ایچیند ه ن .
باغیران توفنگلرین
های هارایی
ساخلامیردی بیزی .
ائویمیز قورخموردو ییخیلماغیندان
اییللر اؤنجه دادمیشدی
اونون دادینی.
الی بوش
اوره یی دولو
آیاقلاری سرت
یوواسی اوسته اوتوران
داغ کیمی دورموشدوق
فیرتینالار اؤنونده .
اینانیردیق
آنلاییردیق
یوللاریمیزین ــ
سئوگی قوخوسونا.
و ــ
بعضا
بیر مغرور قار گیله سی کیمی ،
دوشوردوک پنجه ره لر اؤنونه ــ
کوله کلری دوشونمه دن ،
دایانمادان ،
دورمادان
گئدیردیک یازی آختارماغا.
ساغما آیین ساری سوت ایشیغینی ،
اوره کلرین پیلته سیدیر
سارالان پلمه لر آلتدا.
ایچمه گونه شین اودلو بولاغیندان ،
داغلارا دامجی دامجی سوواشان
آرزولارین قانیدیر ــ
باخما مئشه لرین ،
بوغاز قارنینا.
سئومه دن
گورمه دن
گؤروشمه دن
دردلردیر شیشه ن.قاطار یولو اوسته ــ
قورولان بیر اومود سارایی.
اوره ک تاپیلدیسی ،
دیشی چکیلمه میش ــ
قاطار تاققا تاققی.
و دوراجاقدا گؤزله یه ن
مینلرجه یولچو.
حاق یولونا اینانلارا
آغیزلاریندان
سو
اللریندن
چؤره ک
گؤزلریندن
اومود
و توفنگلرینده ن
باهار فیشقیراردی اونلارین.
بئللرینده بیر دونیانین یوکو اولسادا،
قوش کیمی اوچاردیلار –
چوروموش یئللرده ن،
یاشیل سالخیم سالمیش
ماویلیگه.
باشلاری اوره کلرینده یدی
و اوره کلری آیاغلاریندا.
کؤنول چکن یئرده
آیاغلاری قاباغلارینا قاتیب
یول گئدردیلر.
ائولری هارایلارین
ائرکن چاغی،
یوخولاری درین دوشونجه لرین
قوجاغیدی.
اونلارین آیاغلاریندا
دوداغ ایزی
و آلینلاریندا مؤهور یئری یوخیدی.
گلدیلر،
ساری گونلری ـ
آیاغلارینین آلتیندا اریتدیلر.
گئتدیلر،
سایریشان گوزگو قاباغیندا سارالمادان.
سن گلمز اولدون
سانکی یول اوسته کورپولر،
بولوتلاردان هورولموشدولر.
آیاغ قویسان اونلار،
قویماسان من آغلاردیم
اونلارین یئرینه.
سانکی دره لر-
گؤز اونمایان یئرلره چکیلمیشدیلر.
کئچسن اونلار –
کئچمه سن منیم گؤزلریم یولدا قالاردیلار.
و داغلار،
سؤز داغارجیغینی ـ
الینه آلیب سرت دایانمیشدیلار.
گلسن اونلارین
گلمه سن منیم ............
سن گلمه دین
قارغالار قولاغیمدا
یووا
هورومچکلر گؤزومده
تور
قورموشدولار.
یوللار سانجیلاندی
آیاغلارین کورپه سینی قوسدولارـ
سن یئنه گلمز اولدون.
پنجه ره م
سپدیم گؤزومو
گونه شین جمده یینه.
آیین اولدوزلو
ایشیغینی یالادیم.
چکدیم ایچیمه
شهرین چیراغلارینی
بیر سیگارا ایچینده.
یئنه ده پارلامادی ،
یئتیم پنجه ره م.
دونیانین قاهقاهاسینی
اریدیب ،
توکدوم گؤزومون هیچغیریغینا
کسمه دی آرازینی
کسمه دی کورونو.
گوره سن هاچانا ده کـ
لئشی چیخمیش پنجه ره مین ،
گؤزویاشلی ـ
و گؤزلریم یئتیم قالاجاق.
لوطفن هئچ کس اوخوماسین
داریخما اولوم قارداش
بیر گون سنین ده ـ
ماهنیلارینی اوخویاجام.
بیر گون سنین قورخولو آبرینی آلیب،
سئودالاریمین سوسوز
بوغازینا تو که جم .
قورخوتما منی ،
عشقیمین یانان اوره یی
اود سالاجاق ـ
سنین سسیز یوخولارینا.
و منیم اولوموم –
قورخوداجاق سنین قبریستان خولیالارینی .
آراز
گؤزلر تیکیلیب ،
یاشیللیغلارین
درینلیگینه .
باخدیقجا ،
اوزانیر اینترنت صحیفه لری کیمی ،
قوشا یوللارلا بیر اوره کده دؤیولن
آراز.
هر بیر واراغیندا،
مینلر انسانین
سرینلیی
مینلر آرزولارین یوخوسو.
مینلر سئودا آختارانلارین ،
قبیر داشی.
کیمسه نین گؤزونه
قیزیل گول له لرین
لاله لی ناخیشی.
کیمسه نین کئچمه یه ن گونلرینین
گونشه عوصیانی.
و کیمسه نین ،
گیزلی سئوداسینین
بیر قوجاق ایزی.
آچیلیر صحیفه لر
آرازین اینترنت قوتوسوندان.
گؤزومون بیری کور،
بیری دؤرد گؤرور.
آچیلان کیتابین
واراقلاری اپریم اپریم،
دویولان یاشیللیغلار
گؤزلوک آلتیندا پاریلداییر.
اوره یینده دویون وورموش ،
دانناغلی قامچی یاراسی.
بئلینده شاهلارین
تورپاغ اوغورلوغونون علامتی.
گؤزومو آچاندا
قیغاجی یوللار
یاراشماییر آرازیمین پنجه ره سینه .
بیر باجاسی ،
خانلارین قیلینج اؤپوشدوروب ،
آت کیشنه سیله شاها قالخماغی.
بیر بوخجاسیندا ،
مین ایللیک حسرتله آلیشان
مین اولدوزلو گئجه لرین
سینیغ اوره یی.
آخیر آراز.
یوللاری الینه آلیب ،
باش گؤتوروب گئدیر آراز
یوخولاریمی قولتوغونا قویوب ،
خزره دوغرو قاچیر آراز.
ایللر کئچمه دی
دویغولاریمیزی ساریدیق
سیاست بئلینه .
ایده قوخولو مصراعلاری
آراز ائتدیک تورپاغینا
اکینینه.
ایسته دیکلریمیزی آیاق آلتدا قویوب
اونو قالدیردیق گویه.
سینه میزده یول وئردیک
اونون تانک دیرناغلی آتلیلارینا.
تاپ
تاپ
تاپ
تاپیلدییا
تاپیلدییا
اوره ک سه سیله
آتلار قالخیر آتلیلار دوشور
سینه میزده ن.
چینه نمیش اتلر دیرناغلار آلتدا،
کیشنه میرآتلیلار اوسته
آتلار اوسته.
آی کئشدی
گون کئشدی
ایللر کئچمه دی.
ایللرین ده سینه سی بیزیم کیمی
قان وئریر ایندی
توخدامیر یاراسی.
ترجمه : اسماعیل خرمی
شعر: چارلز رایت
الده ن گئده نلره پرستیش
بیر دیش چیخاریلاندا،
فیرلانان دونیانین
اوجونوندا خبری اولمور.
و فیرلانانلار،
کوله کده و هئچ بیر هاوادا
(ایکسیونا ) بنزه مییه نلر،
سویروشورلر
هئچ نه ایسته مه ده ن،
بوانسان دونیاسیندان
قالین بولودلار اؤز آرخاسینا سؤکه نیرلر.
آدسیز و ماوی،
بوشلوغا ساری گئدیرلر،
گونلر اؤتدویو کیمی
یئنه ده اؤته جکلر.
ایکسیون: بیر افسانوی پادشاه کی حئرا نین سئوگیلیسی له دانیشماقا گورا چرخ گردونو (دونیانی) فیرلاماقا وادار اولدو.
CHARLES WRIGHT
In Praise of What is Missing
When a tooth is extracted,
some side of the holy wheel is unnotched,
And twists, unlike Ixion’s, in the wind and weather,
And one slips into wanting nothing more
from the human world,
And leans back, a drifting cloud,
Toward what becomes vacant and is nameless and is blue,
As days once were, and will be again.
ترجمه: اسماعیل خرمی
شعر: چارلز رایت
معده نلرین درینلیگینده
او دئدی:
من کی بؤلونمه دن یاشاییرام
ایشیغلا دولورام.
و اوردادی قارانلیغ،
او یئرده کی بؤلوننلر دورور.
بیرجه بیرجه
آغیر،
آغیر کلمه لر.
آغ بولوتلار آرتیرلار
سطیرلر قیراقغی اوزه رینده.
یئرین آلتیندا ــ
بیز ائوده ن چوخ اوزاغیق،
بلکه ده چوخ یاخینیق.
CHARLES WRIGHT
Down in the Mines
For I am one who exists from the undivided,
He said, and am filled with light.
And darkness is over there,
where the divided stand.
Tough words, Ace, tough words.
White clouds grow big along the ridge line.
Under the earth we’re far away from home,
or closer to it.
سن يئنه گلمه دين
گؤزومو،
الیمه گوتوروب ،
شهرین ان اوجا یئرینه قویدوم .
قولاغلاریمی ،
بوتون تلئفون زنگینه باغلادیم .
قوللاریمی ،
قوشلارین قانادینا ساریدیم .
آیاغلاریمی ،
ماشینلارین ته که رینه یامادیم .
ساچلاریمی ،
اللریمله یوللارا دوزدوم .
اوره ییمی ،
آخار سولارين گؤزونه وئرديم .
بلكه سن گله سن .
گونلر چووالا گيردي
مين ايليك
حسرت يوكوآلتدا
بئليم بوكولدو
كلمه لر دميرده ن
قولاغلارداشدان
اوزاقدان گلن نسنه لر
پولاتدان هورولموشدولر.
نه بير سس ائشيتديم؛
نه بير شئي گوردوم.
سن يئنه گلمه دين.
ترجمه : اسماعیل خرمی
شعر : چارلز رایت
فلانئرین فرشته سی
بیزی اونلارا یونه لت کی ،
یوللارینی گؤزله ییریک
و اونلار کی بیزیم
حسرتیمیزده دیر.
بلکه سیزین قانادلاریز قورودو بیزی،
بلکه بیز سئوینجلرین،
تر دیارینین ــ
قریبه سی دئییلیک.
اونوتما کی گوجسوزوک بیز.
و سیز ،
ایلدیریم آرخاسیندا ،
اوزانان اؤلکه نین
گوجلوسو.
رافائل،
سن ای سئوینج گؤروشلرین فرشته سی
سن ای ایشیلدییان
ایشیغلارین قارتالی.
CHARLES WRIGHT
Flannery's Angel
Lead us to those we are waiting for,
Those who are waiting for us.
May your wings protect us,
may we not be strangers in the lush province of joy.
Remember us who are weak.
You who are strong in your country which lies beyond the thunder,
Raphael, angel of happy meeting,
resplendent, hawk of the light
